საქართველოს ადგილობრივ თვითმმართველობათა ეროვნული ასოციაციის პროექტის ,,ქალთა ლიდერობა დემოკრატიისთვის საქართველოში“ წამყვანმა კონსულტანტმა, თამარ ფრანგიშვილმა საქართველოს სტატისტიკის ეროვნული სამსახურის მიერ გამართულ შეხვედრაში მიიღო მონაწილეობა, რომელიც გენდერული სტატისტიკის მიმართულებით საქსტატის მიერ ჩატარებული გამოკვლევების შედეგების გაცნობას დაეთმო.

შეხვედრა, რომელსაც კახეთის, მცხეთა-მთიანეთისა და შიდა ქართლის რეგიონის მმართველობისა და თვითმმართველობის წარმომადგენლები იყვნენ ჩართულნი 15-16 ივნისს, ქ. ბორჯომში გაეროს ქალთა ორგანიზაციის (UN Women) ფინანსური მხარდაჭერით გაიმართა.

სემინარზე თამარ ფრანგიშვილმა წარადგინა ანგარიში, რომელიც გაეროს ქალთა ორგანიზაციამ (UN Women) ათეა-სთან და საქსტატთან თანამშრომლობით მოამზადა. თამარ ფრანგიშვილის განმარტებით ანგარიში დაეხმარება მუნიციპალიტეტებს გენდერული თანასწორობის ადგილობრივი დღის წესრიგის უკეთ განხორციელებაში.

,,ანგარიში აერთიანებს გენდერული თანასწორობის ინდიკატორებს, რომელიც სარეკომენდაციო ხასიათისაა და მუნიციპალიტეტებს დაეხმარება შემდგომში კიდევ უფრო განავითარონ მტკიცებულებებზე დაფუძნებული გენდერული თანასწორობის პოლიტიკა. აღნიშნული დოკუმენტი სამომავლოდ  ხელს შეუწყობს  გენდერული თანასწორობის დღის წესრიგის განხორციელებას ადგილზე, ასევე პროგრესის მონიტორინგს და შეფასებას“, - განაცხადა თამარ ფრანგიშვილმა.

ორდღიანი სამუშაო შეხვედრისას, მონაწილეები გაეცნენ გენდერული სტატისტიკის მიმართულებით საქსტატის მიერ ჩატარებული გამოკვლევების შედეგებს, კერძოდ, დროის გამოყენების გამოკვლევისა და ქალთა მიმართ ძალადობის ეროვნული გამოკვლევის მეთოდოლოგიურ მიმოხილვასა და ძირითად მიგნებებს. ასევე, რეგიონული და მუნიციპალური სტატისტიკის პორტალს, საქართველოს სტატისტიკის სისტემის განვითარების ძირითად მიმართულებებს, საქსტატის მიერ შემუშავებულ პროდუქტებს, განვითარებულ სერვისებსა და სამომავლო გეგმებს. გარდა ამისა, განიხილეს სტატისტიკური მაჩვენებლების გაანგარიშების მეთოდოლოგიური თავისებურებები და მათ გამოყენებასთან დაკავშირებული საკითხები. იმსჯელეს სხვადასხვა გენდერულ სტატისტიკურ ინდიკატორებსა და მონაცემთა საჭიროებებზე, დაგეგმვისა და გადაწყვეტილების მიღების პროცესში.

შეხვედრის ფარგლებში ასევე გაიმართა დისკუსია, სადაც მონაწილეებმა განიხილეს მუნიციპალურ დონეზე სტატისტიკურ მონაცემებთან დაკავშირებული საჭიროებები და იმსჯელეს საქსტატის სამომავლო გეგმებში მათი ასახვის შესაძლებლობებზე.